من قلب التيك توك للسجن الرحلة مش بعيدة
زمان كانت الشهرة محتاجة موهبة محتاجة سنين شغل صبر وشوية حظ.
دلوقتي؟ بكام فيديو بكلمتين غريبة، أو رقصة ملهاش أي لازمه تبقى “مشهور”، و”مؤثر”، وتبدأ الإعلانات تنهال واللايفات تشتغل.
بس في الطريق السريع ده ناس كتير طلعت فجأة وناس أكتر وقعت فجأة.
ناس ماكملتش الرحلة لأن الطريق ده كان مفخخ: مش بس تريند، لأ… تريند بـ”تحقيق”!
لما الترند يوصل للتحقيق
بقينا نصحى على أخبار شبه مكررة:
القبض على مشهورة تيك توك بسبب محتوى “غير لائق”
أحاله شاب للنيابة بعد فيديو استفز الناس
استدعاء بلوجر للتحقيق بسبب لايف “مريب”
المشكلة مش دايمًا في الفيديو نفسه لكن في غياب الحدود.
كل حاجة بقت متاحة الجسم، البيت، الخناقة، العياط، الخصوصية، وحتى الأطفال!
كل ده في مقابل إيه؟ كام لايك؟ كام متابع؟ شوية شهرة لحظية؟
طيب وبعدين؟!
الناس سقفت… وبعدين قلبت
إحنا كمجتمعً لينا دور كبير.
بنضحك ونشير وبنساعد في نشر الإسفاف وبعدين لما الدنيا تولّع نقول “دي قلة أدب!”
طيب ما هو اللي عمل التريند عمله عشان حضرتك شيرت وعلقت وضحكت!
إحنا جزء من اللعبة وبنشارك في صناعة وهم كبير اسمه “الشهرة السهلة”.
ما وراء الثروة: الفلوس جاية منين؟!
كتير من مشاهير التيك توك بقى عندهم فلوس عربيات سفريات هدايا، إعلانات…
بس السؤال الحقيقي:
الفلوس دي جاية منين؟
من عرض خصوصيتك؟
من إثارة الجدل؟
من التسويق لقيم فارغة ومحتوى سطحي أو مسيء؟
ناس بتصور حياتها لحظة بلحظة وناس تانية بتبيع كرامتها عشان التفاعل.
وفي الآخر لما الترند يتقلب عليهم بيلاقوا نفسهم لوحدهم.
ولا الجمهور اللي كان بيسقف بينفع
ولا الـ followers بيدفعوا الكفالة.
الشهرة مش لعبة والترند مش إنجاز
الشهرة الحقيقية مش بس أرقام…
دي مسؤولية.
مش معنى إنك بقيت تريند إنك بقيت نموذج.
ومش معنى إن عندك جمهور إنك قد التأثير عليهم.
الشهرة اللي جاية من لا شيء غالبًا بتمشي من غير ما تسيب أي شيء
غير وجع… أو فضيحة… أو محضر!
وقبل ما تطفي الشاشه فكر شوية
لكل شاب أو بنت كانوا بيتفرجوا وبيقولوا:
“نفسي أبقى زيهم… أبقى تريند… أكسر الدنيا!”
بص حواليك دلوقتي…
شوف اللي كنت بتحلم تبقى مكانه بقى فين؟
اللي كنت فاكره قدوة… أتحول لعبرة
الفلوس راحت والجمهور اختفى والتريند اللي كان بيكسر الدنيا بقى عنوان في صفحة الحوادث!
الشهرة مش غاية واللايك مش مكسب
وكرامتك وسمعتك ومستقبلك أغلى بكتير من كام فيديو وفلتر
اسأل نفسك: أنت عايز تبقى مشهور؟
ولا عايز تبقى محترم؟
