الفنان سامح حسين يروي قصة «الملك والجلابية» أمام الرئيس السيسي
استعرض الفنان سامح حسين، أمام السيد الرئيس عبدالفتاح السيسي، خلال حفل الإفطار السنوي الذي نظمته القوات المسلحة، اليوم الإثنين، قصة «الملك والجلابية»، التي تدعو إلى عدم النظر إلى ما وصفه بـ«اشتغالات الحياة»، والتركيز على الوصول في آخر الرحلة عند ملك الملوك بقلوب بيضاء.
وأشار الفنان سامح حسين خلال روايته للقصة: «كان في ملك هندي زمان أوي، حب يدي جائزة كبيرة لواحد من الرعية، وحطله تحدي مقابلها، واداله جلابية ناصعة البياض، وقاله خد الجلابية دي وروح بيتك، وبكرة الصبح من بدري تلبس الجلابية، وتجيلي القصر لو لقتها بيضاء، زي ما سلمتهالك أنت كدا كسبت الجائزة».
فوبيا من المانجا
واستكمل الفنان حديثه: «الراجل قال أيه، الرهان السهل دا الملك دا هندي ولا ايه، ماشي يا مولاي نجيلك بيها بيضاء ايه المشكلة يعني، وروح البيت لقى مراته هتموت، وتفتح الشنطة وتعرف ايه اللي فيها، بس هو مش عاوز حد يلمس الجلابية، فقال لها إن الشنطة دي فيها مانجا هندي، ويظهر بقا مراته كان عندها فوبيا من المانجا فمقربتش من الشنطة».
مشيرا: «تاني يوم صحي الراجل من الصبح بدري، لبس الجلابية بتاعته بحذر، عشان ايده مبتبصمش عليها وخرج من بيته، وطلع على موقف عبود بتاع الهند، وركب أول ميكروباص وقعد في آخر الكنبة عشان محدش يخبط على كتفه، بس الست اللي كانت قاعدة جنبه كانت بردانة تقريبًا فبدأت تعمل معاه نوش، عشان يقفل الشباك، ومع إنه كان حران ومخنوق بس قفلها الشباك».
قصر الملك والجلابية
مؤكدا: «وهو ماشي حذِر جدًا، كان في واحد فارش فرشة كدا بيبيع عليها تمر هندي، رمى بلاه عليه وقال له أنت خبطت لي الفرشة، ودلقت التمر، فصاحبنا محبش يدخل نفسه واداله قرشين تعويض، وكمل طريقه وفضل طول الطريق يجنب نفسه حوارات وصراعات مكنش متخيل إنه ممكن يقابلها، وكان هدفه الوحيد إنه يوصل قصر الملك والجلابية لسه بيضاء».
التحدي في الحياة
واختتم الفنان سامح حسين: «الراجل كسب الرهان، بس عرف قد ايه الحكاية مكنتش سهلة، عارف ايه التحدي الأصعب من الجلابية؟، هو التحدي بتاعي أنا وأنت في الحياة، ولا إننا نقعد على أكبر عدد من كراسي السلطة، ولا إننا نحقق أكبر قدر من الإنجازات والمكاسب، كل دا مهم بس مش أهم حاجة».
