الأب بطرس دانيال يطالب بالدعاء للفنان لطفي لبيب بعد عودته للعناية المركزة
وجّه الأب بطرس دانيال، رئيس المركز الكاثوليكي للسينما، رسالة مؤثرة للجمهور، طالب فيها الجميع بتكثيف الدعاء للفنان القدير لطفي لبيب، بعد أن عاد مرة أخرى إلى غرفة العناية المركزة، بسبب تدهور حالته الصحية.
"الدكتور قاله قبل كده حصل معاك معجزة"
وخلال مداخلة هاتفية له عبر برنامج "الستات" المذاع على قناة النهار، قال الأب بطرس دانيال: "أنا بقول لكل الناس تدعي وتكثف الدعاء بشكل كبير، لأنه المرة اللي فاتت الدكتور قاله حصل معاك معجزة بعد ما اتحسنت حالته، وخرج من المستشفى، لكن للأسف رجع تاني العناية المركزة بسبب التهاب رئوي حاد".
وأوضح الأب بطرس أن الفنان لطفي لبيب كان قد تلقى تحذيرات من الأطباء بضرورة تقليل الكلام والحفاظ على صحته، لكن بسبب طيبته وحماسه للحديث مع محبيه، لم يلتزم تمامًا بهذه التعليمات.
"كان بيتكلم كتير وقلتله اسمع كلام الدكاترة"
وتابع الأب بطرس قائلًا: "أنا زُرته لما خرج من المستشفى المرة اللي فاتت، وكان معايا الفنان الجميل حمزة العيلي، ولقيته بيتكلم كتير جدًا، فكنت دايمًا أقوله معلش يا حبيبي اسمع كلام الدكاترة وخد بالك من نفسك، لأن الكلام الكتير بيتعبك وبيضغط على النفس، وفعلاً عشان كده تعب تاني".
"هدخل أزوره تاني بكرة ونتمنى له الشفاء"
وعن تطورات حالته، أضاف الأب بطرس: "هو النهارده دخل العناية المركزة، وطبعًا مش هيبان تأثير العلاج على طول كده، محتاجين يوم أو اتنين علشان نعرف التطورات، وإن شاء الله بكرا هدخل أزوره وأطمن عليه بنفسي، وكلنا بندعيله من قلبنا يقوم بالسلامة".
واختتم الأب بطرس حديثه برسالة محبة ودعم للفنان لطفي لبيب، قائلًا: "هو فنان كبير وإنسان جميل، وبيحب كل الناس، والكل بيحبه، عشان كده محتاجين كلنا نقف جنبه وندعيله من قلوبنا".
وفي نفس السياق ،أكد الدكتور أشرف زكي نقيب المهن التمثيلية، عودة الفنان الكبير لطفي لبيب للعناية المركزة مرة أخرى بعد تدهور حالته الصحية، وأشار أن الفنان لطفي لبيب في حالة حرجة بعد تدهور حالته الصحية من جديد مطالبا الجميع بالدعاء له.
وفي وقت سابق ،قال الأب بطرس دانيال رئيس المركز الكاثوليكي للسينما، إن الفنان الكبير لطفي لبيب وجّه رسالة محبة وامتنان إلى جمهوره، معبّرًا عن سعادته العميقة بحب الناس واهتمامهم بصحته، مؤكدًا أن هذا الدعم كان له أثر كبير في حالته النفسية.
