خالد منتصر مدافعا عن وفاء عامر: "شيكا نفسه كان محتاج تبرع بالأعضاء"
أعرب الكاتب خالد منتصر، عن استيائه من حملة الاتهامات التي تتعرض لها الفنانة وفاء عامر، عبر مواقع التواصل، تضمنت اتهامات تمس سمعتها، وكذلك تورطها في تجارة الأعضاء البشرية، والتسبب فى وفاة لاعب نادي الزمالك السابق إبراهيم شيكا، قائلًا: "مش فاهم سر هذا الاختيار، وما هي المواصفات القياسية الرهيبة في أعضاء شيكا لكي تخطط وفاء عامر وتكون عصابة مافيا وال كابوني لسرقتها والتجارة فيها!!.
وكتب خالد منتصر على صفحته الشخصية عبر "فيسبوك": "يا جماعة شوية عقل ومنطق، احنا مخنا كشعب مصري إزاي بيصدق هرتلات لا تمت لا لعلم ولا لمنطق ولا حتى عقلية تلميذ في ابتدائي يصدقها، لست محامياً عن الفنانة وفاء عامر، لكني حزين على مستوى العقلية الجماعية المصرية التي باتت تصدق أي هجص وتخاريف، ولا تمتلك أي حاسة نقدية، أو فلتر تحليلي".
شيكا مريض السرطان
وتابع: "بيقولوا إن وفاء عامر بتتاجر في أعضاء اللاعب شيكا الله يرحمه!!!، تمام، نمشي مع اللي بيقول كده وبدل ما ندخله عنبر الخطرين حنناقشه ونطرح عليه شوية أسئلة:
•هي الأعضاء دي بتتاخد كده من مكانها زي ما تكون بتتعامل مع خروف العيد وتوزع كلاويه وكبدته ع الجيران !!، الأعضاء دي عايزه محاليل حفظ معينة، ومدة محددة للنقل بعدها و….الخ، والأهم هو الواحد بياخد عضو وبعدين يمشي يدلل عليه في الشارع، وينادي ياللي عايز فشه، كبده صابحه للمتليف، كلاوي طازه عال العال، والا لازم توافق أنسجة، ونظام كمبيوتر يحدد للمستقبل فلان اللي نسيجه متوافق، إن فلان المتطابق معاك متوافر عضو منه".
وأكمل: "لكن تقول إيه للعقول العجول اللي بتتفرج وبتاخد ثقافتها الطبية من أفلام قنوات بير السلم، وبعدين هو اللي عايز يتاجر في الأعضاء مش لاقي يا عيني إلا الغلبان الراجل الطيب شيكا مريض السرطان، اللي كبده منهك، وكليته بتخلص، وكل أعضائه محتاجة دعم، هو نفسه كان محتاج تبرع بالأعضاء الله يرحمه".
وأضاف "مش فاهم سر هذا الاختيار، وما هي المواصفات القياسية الرهيبة في أعضاء شيكا لكي تخطط وفاء عامر وتكون عصابة مافيا وال كابوني لسرقتها والتجارة فيها!!.
واختتم "بيصعب عليا قوي أحكي في بديهيات، وأحاول أقنع ناس متعلمين وحاصلين على دكتوراهات ومصدقين هذا العبط والهبل وتلك الهلاوس، ده احنا في مرار طافح، وتحت القاع بحوالي اتنين كيلو متر !!.
