«الفرحة فرحتين».. سوزي: جبت 50 ٪ في الثانوية العامة وخطوبتي بعد يومين

أثارت البلوجر سوزي الأردنية تفاعلًا واسعًا على مواقع التواصل الاجتماعي، بعد مشاركتها مقطع فيديو عبر حسابها الرسمي على تيك توك، كشفت فيه عن حصولها على 50% في الثانوية العامة لعام 2025، معلنة خطوبتها خلال يومين رغم عدم معرفتها بمن ستخطب له حتى الآن.

سوزي تحتفل بنجاحها في الثانوية العامة

 وقالت سوزي في الفيديو: "الحمد لله نجحت وجبت 50%. خطوبتي بعد يومين، معرفش على مين لسه، بس اللي ييجي هوافق عليه، اللي كان موقفني عن الارتباط هي الشهادة".

جبت 50% بمجهودي.. سوزي تعلق على النتيجة برسالة لمتابعيها

وأضافت سوزي خلال الفيديو: "بقالي سنة عايزة أرتبط، وأمي كانت بتقولي: انجحي الأول. جبت 50% بمجهودي، بقالي سنتين بذاكر، ودي السنة التالتة، وأقسم بالله إن النجاح دا من عند ربنا". 

وأكدت أنها تنوي الالتحاق بـ جامعة خاصة لأنها لن تتمكن من دخول جامعة حكومية بهذا المجموع، وقالت مازحة: "خلاص محدش يكلمني، هخش جامعة خاصة وهاخطب، اللي شمت فيا مش هقوله غير ربنا يسامحك".

التعليم تعلن أسماء أوائل الثانوية العامة 2025

وكانت وزارة التربية والتعليم والتعليم الفني قد أعلنت اليوم الثلاثاء، بشكل رسمي، نتيجة الثانوية العامة للعام الدراسي 2025، وذلك بعد اعتمادها من الدكتور محمد عبد اللطيف، وزير التربية والتعليم، كما تم الكشف عن أسماء أوائل الثانوية في الشعب الثلاث: العلمي علوم، العلمي رياضة، والأدبي. وشهدت النتيجة تفاعلًا واسعًا عبر المنصات الرقمية، خاصة مع ظهور قصص طلاب وطالبات على غرار قصة سوزي التي أثارت الجدل.

وفي سياق أخر، أعربت البلوجر سوزي الأردنية عن سعادتها البالغة بحضورها العرض الخاص لفيلم الشاطر بطولة أمير كرارة وهنا الزاهد، الذي أقيم أول أمس في إحدى السينمات بمدينة 6 أكتوبر، كما ردت على انتقادات حضورها للعرض الخاص للفيلم وعلاقتها بالوسط الفني.

كنت معزومة أنا ومؤمن 

وقالت سوزي في فيديو عبر خاصية القصص القصيرة على حسابها بموقع إنستجرام: “أنا بجد كنت في قمة الانبساط بحضوري العرض الخاص وكنت معزومة أنا ومؤمن، وبلوجرات تاني كتير، وشكرًا على استقبال الناس لينا، وشكرا للصحافة وذوقهم وأسلوبهم معايا والضحك والهزار، أنا اجتماعية جدًا وبحب أضحك وأهزر مع الناس كلهم، وربنا يديني على قد نيتي ويحبب الناس فيا”.

الناس كانت بتعاملني على إني واحدة منهم 

وأضافت سوزي الأردنية: “الناس كانت بتعاملني على إني واحدة منهم من غير ما يكون بينا عشرة، ومش قادرة أقول أنا كنت مبسوطة إزاي والفيلم كان حلو، والسوشيال ميديا كانت مقلوبة صور وفيديوهات ليا وأنا مع الممثلين بشكركم جدًا وكلكم فوق دماغي".

الناس كانت حبانا أنا ومؤمن سوا

وتابعت سوزي: "مبسوطة إني أنا ومؤمن روحنا سوا وكنا معزومين إحنا الاتنين، الناس كانت حبانا جدًا سوا، حاسة أننا احنا الاتنين لازم نبقى مع بعض هو لوحده مش نافع وأنا لوحدي لأ، كنا مكملين بعض وهو كان زي العسل والقمر باللبس، شخص محترم جدا بيحترمني ويكبرني قدام الناس وبعيد عن الناس، ولما كنت شايفاه فرحان كأنه أقسم بالله مي أختي أو ابني او بنتي، فرحانة إننا بنكمل بعض وبنكبر سوا على السوشيال ميديا، وكان يوم تحفة”.

وأكملت: “فيه ناس بتقول إنتي اللي شهرتي مؤمن، وأنا محبش الكومنت ده، هو ضايف ليا حاجات كتير وغيرني للأحسن ومفيش الكلام ده، وإحنا بنكمل بعض وعيب الكلام ده”.

أنا واحدة متعلمة ومش كل اللي في الوسط معاهم شهادة 

وعن الانتقادات التي تتعرض لها: “في ناس مهجماني بتقول إزاي تروحي عرض خاص بتاع ممثلين ودلوقتي عرفنا نحط الشهادة فين، أنا واحدة متعلمة وبروح امتحاناتي، ومش كل اللي في الوسط معاهم شهادة ومتعلمين، ومع ذلك كلهم فوق دماغي، أنا ما أحتكتش بحد ولا قلت لحد والنبي اتصور معايا أو اتعامل معايا، أنتم شفتم الناس كانت حباني وكنت معزومة، ومش أي حد في الدنيا هيروح، ولكن ناس معينة فقط”.