محمد فارس: وسام أبو علي هو من ضحى بعلاقته بجمهور الأهلي
اتّهم الإعلامي محمد فارس اللاعب وسام أبو علي بالتفريط في علاقته مع جمهور الأهلي، مؤكدًا أن الأخير لم يُقصّر يومًا مع لاعبيه، لكن لا يمكن أن يدعم من "ضحّى بالنادي".
وقال فارس، في تغريدة له عبر صفحته الرسمية بمنصة "إكس": "اللي عايز يتكلم عن موقف جمهور الأهلي من وسام لازم يحكي الموقف بشكله الحقيقي عشان يشوف رد فعل جمهور الأهلي طبيعي ولا لا.. ارجع بالذاكرة شوية صغيرين بس وقت خروج محمد عبد المنعم من الفريق وانتقاله لنيس الفرنسي وازاي جمهور الأهلي كان بيكبر منعم من خلال تفاعل مع صفحة نيس وصل المسؤولين في نيس لحالة ذُهول من الدعم للاعب وأرجع شوف رد فعل جمهور الأهلي على رسالة منعم والڤيديو اللي عمله للجمهور".
وأردف: "طيب هتروح بعيد ليه شوف كريم وليد وهو بيخرج من الأهلي دلوقتي ورغم انه مكنش موفق في التجربة الأخيرة مع الأهلي الجمهور بيتسابق إن محدش يوجه أي رسائل سلبية للاعب.. حتى وسام نفسه لما اتقال إن عنده عروض قطاع كبير من جمهور الأهلي كان مع رحيله والإستفادة المالية منه وفي التوقيت ده محدش أتكلم على وسام بأي شكل سلبي أو وجه أي هجوم للاعب".
فارس: وسام تمارض ورفض الفحص و20% من عقده طارت بالعقوبات
واستطرد الإعلامي محمد فارس: "إنما وسام اللي اختار يغير شكل الحكاية من عدم نزول للتدريبات ومن تمارض ومن رفض إجراء الفحص الطبي للتأكد من اصابته ومن عقوبات اتوقعت عليه وصلت لـ٢٠ ٪ من قيمة عقده والأسوأ في القصة كلها هي بيان الاتحاد اللي خرج ضد الأهلي وجمهوره واللي أي عاقل فاهم انه مستحيل مستحيل كان يخرج إلا بموافقة اللاعب ولو ده محصلش كان لازم اللاعب وقتها وفي نفس اللحظة مش لما يتباع يكتب ويقول ان البيان لا يمثله ولا يمثل علاقته بالأهلي وجمهوره انما طبعاً كان المخطط مختلف ودي قصة تفاصيلها لا تصدق".
إعلامي: جمهور الأهلي لا يدعم أحدًا على حساب الكيان واللي فرّط هو وسام
وتابع: "عشان كده جمهور الأهلي مش هو اللي فرط في علاقته بوسام لا ده وسام اللي ضحى بالعلاقة دي وعظمة جمهور الأهلي انه رفض يسانده فيها لان عمره ما ساند لاعب على حساب النادي. فوسام قال جملة زمان أنا فهمتها دلوقتي " أنا جي عايز أقدم مستوى كويس عشان تيجي ليا عروض أكبر واقدر أستفيد والأهلي كمان يستفيد " فاللي بين أغلب جمهور الأهلي ووسام دلوقتي هي الجملة العملية دي المجردة من المشاعر استفادة مالية للطرفين ونقطة ومن أول السطر وخلصت الحدوتة".
