مجدي عبد الغني يفتح النار على فتوح: "ما تستاهلش تشوف الساحل بعد اللي عملته"
شن الإعلامي مجدي عبد الغني هجومًا لاذعًا على لاعب نادي الزمالك أحمد فتوح، بعد غيابه عن معسكر الفريق، وظهوره لاحقًا في إحدى الحفلات بالساحل الشمالي، وهو ما أثار موجة غضب واسعة بين جماهير النادي.
وخلال برنامج مجدي عبد الغني "ملعب البلدوزر" المذاع عبر قناة الشمس الفضائية، قال عبد الغني: "المفروض فتوح ده ما يشوفش طريق الساحل الشمالي تاني بعد اللي عمله، مش معقول يغيب عن المعسكر ويطلع في حفلة ويقول أنا كنت بزور حد.. ده اسمه كلام؟!".
انتقاد حاد لـ أحمد فتوح
وفي هجومه الحاد، أشار مجدي عبد الغني إلى أن تبريرات اللاعب باتت غير مقنعة، خاصة في عصر السوشيال ميديا، الذي لا يترك شيئًا مخفيًا.
وأضاف مجدي عبد الغني: "دلوقتي مافيش حاجة بقت تستخبى، الموبايلات والسوشيال ميديا فضحت كل حاجة، فمش هتقدر تقول كنت بزور أو في مشوار تاني، وانت متصور وسط الملايين".
وأرفق كلام مجدي عبد الغني بمقطع مصور يظهر فيه اللاعب وهو يحاول الابتعاد عن الكاميرا، قائلاً: "هو عارف إنه عامل حاجة غلط، بيخبي وشه ومش عايز حد يصوره، طب لو مش غلطان.. خايف من إيه؟".
أنت لاعب موهوب
رغم النقد الحاد، أبدى مجدي عبد الغني احترامه لقدرات فتوح الفنية، قائلاً: "أنا بحبك يا فتوح، والله إنت لعيب كويس جدًا ومستواك عالي، وعندك إمكانيات تخليك من أغنى لاعبي الكرة في مصر، لكن دماغك بتسوحك".
وانتقد مجدي عبد الغني الطريقة التي يتعامل بها اللاعب مع مستقبله، معتبرًا أن فتوح يفرّط في موهبته، موضحًا: "الولد جاب فيلا وركب عربية، لكن طيّر عربيتين في حوادث! العربيات دي تساوي أكتر من 50 مليون جنيه، والناس بتتعب علشان تجيب لقمة عيش".
حافظ على نفسك
وجه مجدي عبد الغني رسالة مباشرة إلى اللاعب، دعاه فيها إلى الحفاظ على نفسه وعلى مستقبله الكروي، قائلاً: "احفظ نفسك مش بس علشان نفسك، كمان علشان نادي الزمالك اللي انت بتلعب فيه، وعلشان منتخب مصر، لأن بلدك محتاجاك".
واستطرد مجدي عبد الغني: "زي ما إحنا عملنا زمان وضحينا، وكنا بننتظر مردود محترم، لكن للأسف، ناس كتير بتهاجمك على السوشيال ميديا وتطلعك عدو، لكن ربنا كريم، وهينتقم من اللي بيظلم".
الانضباط والحرية الشخصية
أثار غياب أحمد فتوح عن معسكر الفريق، ثم ظهوره في مكان غير رياضي، جدلًا كبيرًا داخل النادي وبين جماهيره، خاصة في ظل سعي الزمالك إلى استعادة التوازن الفني والانضباط داخل صفوفه.
وتنتظر إدارة النادي تقريرًا فنيًا وإداريًا لتحديد العقوبة المناسبة، خاصة بعد تكرار الوقائع المشابهة في أوقات سابقة.
نجم في مفترق طرق
أحمد فتوح يُعد من أبرز لاعبي الجبهة اليسرى في مصر، وسبق له المشاركة مع منتخب مصر في بطولات كبرى، لكن تصرفاته الأخيرة باتت محل انتقاد من الإعلام والجمهور على حد سواء.
ويبقى السؤال: هل يتدارك اللاعب الموقف، ويعود أقوى، أم أن "الدماغ اللي بتسوحه"، كما وصفها عبد الغني، ستُبعده عن الملاعب سريعًا؟
في النهاية، وجه مجدي عبد الغني رسالة صريحة إلى اللاعب مفادها: "أنت تملك كل شيء، لكنك تخسره بيدك .. حافظ على نفسك، علشان تفضل بطل فعلاً، مش بس على السوشيال ميديا".
