محمد رياض: أنا صاحب فكرة انطلاق المهرجان القومي للمسرح في ربوع مصر

قال الفنان محمد رياض: "أنا صاحب فكرة انطلاق المهرجان القومي للمسرح المصري خارج القاهرة. عرضت الفكرة على اللجنة العليا للمهرجان، وهي لجنة كبيرة وتضم قامات مسرحية مهمة، ولما طرحتها لقيت ترحيب كبير جدًا، وبدأنا على طول نشتغل على تنفيذها وتحديد الآليات اللازمة".

حلم قديم يسعى لتنفيذه على أرض الواقع

أوضح رياض خلال استضافته عبر برنامج"ON Set" المذاع عبر قناة ON، أنه يتحدث عن هذه الفكرة منذ العام الماضي، وكانت بالنسبة له حلم حقيقي، مضيفًا: "كنت دايمًا شايف إن مش لازم كل حاجة تحصل في القاهرة، وكنت بحلم إننا السنة الجاية نعمل الافتتاح في محافظة تانية، مش لازم تكون كبيرة، بالعكس أنا حابب تكون محافظة صغيرة، زي قنا أو الإسماعيلية مثلًا".

المحافظات أولى بالمسرح

أضاف: "أنا مؤمن إن المهرجان القومي للمسرح لازم يلف كل مصر، ويخرج من مركزية القاهرة، علشان كل المصريين يحسوا إن الفن بتاعهم وواصل ليهم، والمسرح مش حكر على العاصمة".

ترويج ثقافي وسياحي في نفس الوقت

أكد الفنان محمد رياض أن الفكرة مش بس هدفها ثقافي، لكن كمان لها بعد سياحي واضح، وقال: "لما نروح محافظة نعمل فيها مهرجان، بنكون بنروج ليها بشكل غير مباشر، الناس بتتعرف على المكان، وتبدأ تشوف جماله وتاريخه دي قوة مصر الناعمة، والمسرح جزء أساسي منها".

نقدر نعمل ده

وتابع: "إحنا نقدر نعمل ده في كل مكان في مصر، ونوصل المسرح لكل الناس، ونربط الفن بالهوية المحلية والسياحة ده حلمي، وبشتغل على إنه يبقى واقع"، بهذه الكلمات اختتم محمد رياض حديثه عن مشروعه المنتظر.

وفي وقت سابق ،أعرب الفنان محمد رياض، رئيس المهرجان القومي للمسرح المصري، عن ارتياحه تجاه مستوى الدعم والرعاية التي حظيت بها الدورة الحالية من المهرجان، مؤكدًا أن تجاوب الرعاة كان إيجابيًا وفعّالًا، ما أسهم بشكل كبير في تحقيق أهداف المهرجان وتنفيذ فعالياته بجودة عالية.

وأشار رياض  إلى أن التعاون المثمر مع الرعاة ساهم في توفير بيئة مناسبة لتنظيم عروض مسرحية متنوعة ومتميزة، مما عزز من حضور الجمهور ورفع من مستوى الفعاليات الفنية والثقافية المصاحبة.