"أرض من ذهب".. مشروع فني مصري يخطف الأنظار في أسوان

نشر الكاتب تامر عبده أمين تعليقًا لافتًا على صفحاته الرسمية، دعا فيه إلى الالتفات لمبادرات فنية ملهمة تحدث في الشارع المصري، بدلًا من التركيز المفرط على قضايا الجدل والسرقات الفنية التي شغلت الرأي العام مؤخرًا.

مشروع أرض من ذهب

وفي هذا السياق، أشاد تامر عبده أمين بمشروع "أرض من ذهب" الذي نفذه الفنانان مها جميل وعلي عبدالفتاح بأسوان، واصفًا إياه بأنه نموذج حقيقي للإبداع الصادق، يعكس جمال مصر وموهبة شبابها بعيدًا عن الأضواء والاستعراض.

وقال تامر عبده أمين: بعد إذن موضوع سرقة اللوحات اللي أخد مننا وقت طويل جداً؛ إحنا دلوقتي ورانا حاجة تانية أهم بكتير محتاجين نهتم بيها ونديها من وقتنا".

وأكمل: وأنت ماشي في محافظة أسوان في طريق السادات اللي بيودي على المطار هتقابل في الطريق الـ 4 عمارات اللي عليهم رسومات تحفة وشيك دول!.. ده جزء من مشروع فني اسمه "أرض من ذهب" بينفذه الزوجين اللي في الصورة دول واسمهم "مها جميل"، و"علي عبدالفتاح".

تفاصيل الفكرة 

وأردف:  "مها"، و"علي" وبالتنسيق مع محافظ أسوان عرضوا فكرتهم على المحافظة وأخدوا موافقتهم واشتغلوا عليها ليل نهار وعرضوا حياتهم للخطر واتعلقوا في سقالات بالـ 12 ساعة آكلين شاربين فوق عشان يعملوا العظمة دي.. 4 رسومات عملاقة على جدران 4 عمارات.. والهدف؟.. قالوا في أكتر من حوار صحفي إنهم عايزين يبينوا قيمة وجمال بلدهم أسوان قدام السياح والضيوف الأجانب اللي بيزوروا البلد.

واستطرد: ركزوا في التفاصيل.. الملامح.. العيون.. الألوان.. إبهار بصري مالوش حدود نفذه زوجين شباب مصريين موهوبين بجد.. مش سارقينهم، ولا ناقشينهم، ولا ناقلينهم من حد.. زيهم زي ملايين الشباب الموهوبين اللي موجودين في كل شبر على أرض البلد دي ومنتظرين فرصة يقولوا إحنا أهو بدون منظرة، ولا أونطة، ولا إدعاء..

كما تابع: مشكلتنا الأبدية إننا بندي إهتمام للصغيرين وبننسى نشاور على الكبار الحقيقيين.. عشان كده أتمنى بنفس درجة الحمقة اللي اتحمقناها كلنا بخصوص موضوع سرقة اللوحات في قصة "مها الصغير" إننا نتكلم ونشكر ونُبدي إعجابنا بـ "علي"، و"مها".. الكُبار ولاد الكُبار.