مش كل الفنانين معاهم شهادة.. سوزي الأردنية ترد على انتقادات حضورها عرض الشاطر
أعربت البلوجر سوزي الأردنية عن سعادتها البالغة بحضورها العرض الخاص لفيلم الشاطر بطولة أمير كرارة وهنا الزاهد، الذي أقيم أول أمس في إحدى السينمات بمدينة 6 أكتوبر، كما ردت على انتقادات حضورها للعرض الخاص للفيلم وعلاقتها بالوسط الفني.
كنت معزومة أنا ومؤمن
وقالت سوزي في فيديو عبر خاصية القصص القصيرة على حسابها بموقع إنستجرام: “أنا بجد كنت في قمة الانبساط بحضوري العرض الخاص وكنت معزومة أنا ومؤمن، وبلوجرات تاني كتير، وشكرًا على استقبال الناس لينا، وشكرا للصحافة وذوقهم وأسلوبهم معايا والضحك والهزار، أنا اجتماعية جدًا وبحب أضحك وأهزر مع الناس كلهم، وربنا يديني على قد نيتي ويحبب الناس فيا”.
الناس كانت بتعاملني على إني واحدة منهم
وأضافت سوزي الأردنية: “الناس كانت بتعاملني على إني واحدة منهم من غير ما يكون بينا عشرة، ومش قادرة أقول أنا كنت مبسوطة إزاي والفيلم كان حلو، والسوشيال ميديا كانت مقلوبة صور وفيديوهات ليا وأنا مع الممثلين بشكركم جدًا وكلكم فوق دماغي".
الناس كانت حبانا أنا ومؤمن سوا
وتابعت سوزي: "مبسوطة إني أنا ومؤمن روحنا سوا وكنا معزومين إحنا الاتنين، الناس كانت حبانا جدًا سوا، حاسة أننا احنا الاتنين لازم نبقى مع بعض هو لوحده مش نافع وأنا لوحدي لأ، كنا مكملين بعض وهو كان زي العسل والقمر باللبس، شخص محترم جدا بيحترمني ويكبرني قدام الناس وبعيد عن الناس، ولما كنت شايفاه فرحان كأنه أقسم بالله مي أختي أو ابني او بنتي، فرحانة إننا بنكمل بعض وبنكبر سوا على السوشيال ميديا، وكان يوم تحفة”.
وأكملت: “فيه ناس بتقول إنتي اللي شهرتي مؤمن، وأنا محبش الكومنت ده، هو ضايف ليا حاجات كتير وغيرني للأحسن ومفيش الكلام ده، وإحنا بنكمل بعض وعيب الكلام ده”.
أنا واحدة متعلمة ومش كل اللي في الوسط معاهم شهادة
وعن الانتقادات التي تتعرض لها: “في ناس مهجماني بتقول إزاي تروحي عرض خاص بتاع ممثلين ودلوقتي عرفنا نحط الشهادة فين، أنا واحدة متعلمة وبروح امتحاناتي، ومش كل اللي في الوسط معاهم شهادة ومتعلمين، ومع ذلك كلهم فوق دماغي، أنا ما أحتكتش بحد ولا قلت لحد والنبي اتصور معايا أو اتعامل معايا، أنتم شفتم الناس كانت حباني وكنت معزومة، ومش أي حد في الدنيا هيروح، ولكن ناس معينة فقط”.
واختتمت سوزي حديثها قائلة: “أنا بعافر لوحدي في تعبي ومسؤولية نفسي وأخواتي وأهلي ومسؤولة عن أسرة كاملة، وخايفة ربنا ما يعوضنيش، لأن فيه سنين راحت على الفاضي وشفت حاجات كتير وحشة ومريت بحاجات كتير وحشة وبتمنى ربنا يعوضني خير واحد في المية عن التعب اللي تعبته”.
