رضوى الشربيني تعلق على تهديد فتاة من خطيبها: «الجملة دي تنهي أي علاقة فورًا»
ردّت الإعلامية رضوى الشربيني على رسالة من إحدى المتابعات وصفتها بأنها "مشكلة كبيرة جدًا"، وأعلنت في بداية حديثها أنها لن تقرأ كامل الرسالة، بل ستتوقف عند جملة بعينها رأت أنها غير مقبولة نهائيًا.
هو بيحب شغله
بدأت رضوى الشربيني، في فقرة "اسأل رضوى" من برنامجها المذاع عبر قناة DMC، الرسالة بسرد المتابعة لعلاقتها بشاب وصفته بأنه محترم، لا يخون، طموح، ومجتهد في عمله، ولكن توقفت عند هذه النقطة قائلة: "كويس إنه ناجح وطموح، بس فين الحب ليكي؟ حب الراجل لشغله ملوش علاقة بحبه ليكي.. هو بيحب نفسه وشغله، مش شرط يكون بيحبك".
قالت رضوى الشربيني: "واصلت الفتاة في رسالتها توضيح خلفية خطيبها العائلية"، مشيرة إلى أن والده يعاني من إعاقة ذهنية، ووالدته عصبية إلى حد أنها دخلت السجن بعد مشاجرة مع مديرتها في العمل.
علّقت رضوى الشربيني على ذلك بقولها: "الظروف دي صعبة، بس ما تبررش العصبية أو التهديد.. في فرق كبير بين الضغط النفسي والإساءة المتعمدة".
لو ضربتك هتزعلي؟
تابعت رضوى الشربيني: الجملة التي قالتها الفتاة في رسالتها، وتوقفت عندها رضوى تمامًا، كانت على لسان الشاب: "هو لما بيزعل بيقولي: لو ضربتك هتزعلي؟"
لترد رضوى الشربيني بغضب واضح: "أنا لو مكانك، الجملة دي كافية تنهي العلاقة فورًا.. ده مش حب، ده تهديد"، وأكملت:"لو عكستوا الأدوار، وإنتي اللي قلتي له الجملة دي، كان ضربك بالقلم.. لأنه شايف إن ليه كرامة، طيب وإنتي؟ الست مالهاش كرامة؟"
في فرق بين الغلط والتجاوز
فرّقت رضوى الشربيني بين الخطأ العابر الناتج عن لحظة غضب، وبين التجاوز المتعمد، قائلة: "في فرق بين إن يكون في بينك وبين خطيبك ود يخليه يغلط ويتصلح، وإنه يتجاوز في حقك ويشوف هتسكتي ولا لأ".
وأكدت رضوى الشربيني: "اللي بيتجاوز مرة، هيكمل ويتجاوز تاني وتالت.. وهيفضل يختبرك لحد ما يعرف سقفك فين".
نصيحة حاسمة للفتيات
اختتمت رضوى الشربيني حديثها برسالة قوية لكل فتاة تتعرض للتهديد أو الإهانة: "انتي عندك كرامة.. واللي يقولك 'لو ضربتك هتزعلي؟' ما ينفعش يكمل في حياتك.. النقطة دي نهاية السطر، وتبدئي من جديد".
وقبل أن تغلق الفقرة، طلبت رضوى الشربيني تشغيل التكييف مازحة، وسط تفاعل الجمهور قائلة: "حر سخن والموضوع سخن.. فاهمين إني لما بتكلم ببقى منفعلة!"
