عمرو سلامة: 60% من اللي كسبته من الشغلانة صرفته على اللي حصل لي من وراها

تحدث المخرج عمرو سلامة عن طبيعة عمله في المجال الفني والصعوبات التي واجهها، مشيرًا إلى أنه في صغره كان يرفض فكرة الوظيفة التقليدية ذات المواعيد الثابتة، لكنه أصبح الآن يحسد من يعملون بهذه الطريقة.

وقال عمرو سلامة في برنامج يوم ليك: “أكتر حاجة تمنيتها وأنا صغير، رغم إننا كنا بنقولها كإيفيه، إني مستحيل أشتغل من 9 لـ5.. لكن دلوقتي بحسد جدًا الناس اللي حياتهم مستقرة، عارفين إمتى يشتغلوا، وإمتى إجازتهم، وفلوسهم ثابتة ومضمونة، مش ممكن يقعدوا سنة كاملة من غير دخل”.

وأضاف المخرج عمرو سلامة: "الشغلانة دي أكتر حاجة تعبت فيها في حياتي، وعمري ما أخدت الفلوس اللي أستحقها، ودي قصة حياة كل فنان في مصر، ومع ذلك، أنا محظوظ وسعيد وببوس إيدي وش وظهر."

وتابع متحدثًا عن التحديات المالية التي واجهها خلال مسيرته:"مكنتش متخيل إن الشغلانة دي ممكن تستهلكني بالشكل ده، صرفت فلوس كتير جدًا في حياتي، وبدون مبالغة 60% من الفلوس اللي عملتها صرفتها على اللي حصل لي وأنا بجيبها.. علاج، دكاترة، سفر علشان أفك، وحاجات غالية أشتريها لأني بقول حصل لي كذا وكذا."

وأكمل: "عمري ما حسيت بفكرة إن 'الجمعة حلوة'، وأنا دلوقتي بقالى 4 شهور مأجرتش يوم جمعة لأسباب مختلفة.. حاسس إن النهاردة الخميس وخروجة."

وأشار عمرو سلامة إلى أنه رغم كل هذه التحديات، فهو سعيد بما يفعله، مضيفًا:"لكن دي مشكلة مبسوط إنها عندي، لأني لو كنت لابس كرفتة ورايح شغل مكتبي، كنت هقطع شراييني.. مش لأنه شيء سيئ، لكن لأنه مش تركيبتي".

عمرو سلامة يستعد لعرض مسلسل برستيج

يستعد المخرج عمرو سلامة لعرض أحدث أعماله برستيج، وهو مسلسل مكون من 8 حلقات، يتناول عالم الجريمة في إطار كوميدي، وانتهى مؤخرًا من تصويره.

تدور أحداث المسلسل حول عاصفة قوية تضرب شوارع القاهرة، ما يدفع 14 شخصًا من خلفيات اجتماعية مختلفة إلى اللجوء لمقهى في وسط البلد بعد انقطاع الكهرباء وعودتها، لكن سرعان ما تتحول الأجواء إلى توتر شديد، عندما يكتشف الجميع وقوع جريمة قتل، ومع تصاعد الأحداث، يدركون أن القاتل بينهم، لتبدأ رحلة كشف اللغز في إطار من الكوميديا السوداء والتشويق.

يشارك في بطولة المسلسل كل من: مصطفى غريب، عبد الرحمن توتة، سامي مغاوري، دينا، راندا عوض، بسام رجب، آلاء سنان، أمينة البنا، معاذ نبيل، وعمر شريف. العمل من تأليف وسيناريو وحوار إنجي أبو السعود، وإخراج عمرو سلامة.

آخر أعمال عمرو سلامة

يُذكر أن آخر أعمال عمرو سلامة كان مسلسل كاستينج، من إنتاج الشركة المتحدة للخدمات الإعلامية، حيث قدّم خلاله 13 موهبة فنية جديدة. تم عرض حلقتين من المسلسل، وحققتا ردود فعل قوية بين الجمهور، كما شارك فيه عدد كبير من الفنانين بالتعاون مع نقابة المهن التمثيلية.