الورش الحرفية في خطر والمعدات بالملايين معرضة للضياع

قال محمد حسين، عضو اتحاد مستأجرين مصر,عضو اتحاد مستأجرين مصر برئاسة المستشار شريف الجعار، إن أزمة قانون الإيجار القديم تهدد آلاف الورش الحرفية التي تحتوي على معدات تُقدر قيمتها بملايين الجنيهات.
وأوضح حسين أن:
"الورش اللي بنشتغل فيها جهزناها على مقاس المكان، ركبنا فيها معدات على حسب المساحة وظروف الشغل. بعد 5 سنين من دلوقتي، لو اضطرينا نسيب المكان، المعدات دي هتبقى خردة تتباع بالكيلو، لأن نقلها لمكان تاني مش بس مكلف، دا كمان صعب تلاقي مكان يناسبها."
وأضاف: "النشاط الحرفي مرتبط بالموقع، يعني ماينفعش أبيع دهب في سوق خضار! والمشكلة إن لما كنا بنأجر زمان، ماكنش فيه نظام تمليك، وكنا بنحط تحويشة العمر في الورش دي، من غير ضمانات مستقبلية."
وأشار حسين إلى أزمة أصحاب المعاشات من المستأجرين التجاريين، قائلاً:
"أنا مثلًا دلوقتي عندي 51 سنة، وخلصت 15 سنة تأمينات، لو خدوا مني المحل، هقعد أعمل إيه؟ مين هيشغلني؟ لما أروح لأي حد أقوله شغلني، هيقولي اشتغل فين وأنت في السن ده؟"
وأكد أن التأمينات الاجتماعية بتشترط لإعطاء المعاش غلق الرخصة والسجل التجاري وتسليم المحل لصاحبه الأصلي، رغم أن أغلب الجيل الأول من المستأجرين التجاريين بيسلموا المحلات بعد سن الستين.
وتابع: "المحلات دي ماخدناهاش ببلاش، أهالينا باعوا ورثهم ودهبهم، وناس اتغربت علشان توفر لنا مصدر رزق. ومن 2022، إحنا قعدنا في لقاءات رسمية مع نواب في البرلمان، وطلبنا رفع الإيجار، ووافقنا وماتكلمناش، ورغم كده مافيش حاجة اتحركت."
واختتم حسين كلامه بمناشدة الرئيس عبد الفتاح السيسي قائلًا:
"إحنا مش ضد القانون، بس بنطلب إنه يتعدل بشكل عادل، وينفذ حكم المحكمة، لأن دلوقتي الإيجارات بقت قريبة من القيمة السوقية، بل وأحيانًا أغلى من محلات تانية مش مؤقتة. لو الرئيس ما صدقش على القانون، بيرجع لمجلس النواب ويتعدل، وإحنا مع القانون العادل اللي يضمن حقوق كل الأطراف."

كما أكد, رئيس اتحاد مستأجري الإيجار القديم، شريف الجعار، أن المستأجرين لا يثيرون الفتنة كما يدعي الملاك، لافتًا في الوقت ذاته إلى أنهم أول من تقدم بمشروع قانون لحل أزمة الإيجار القديم.

وتزداد حدة التوتر بسبب قانون الإيجار القديم، في ظل رفض المستأجرين لأي بدائل طرحتها الحكومة، ما وصفه الملاك بالتعنت، الأمر الذي قد يُعيق تطبيق القانون دون مشاكل، وذلك حسبما أكد رئيس اتحاد ملاك العقارات القديمة، مصطفى عبد الرحمن في تصريحات خاصة لموقع "نيوز رووم"، حيث كشف 10 أسباب لرفض أي بديل.