"أسود يوم في تاريخ النادي" .. مشجعو الأهلي يصفون الانسحاب من مباراة القمة

أثار قرار مجلس إدارة النادي الأهلي بالانسحاب من مباراة القمة جدلًا واسعًا في الأوساط الرياضية المصرية وبينما دافع الكثيرون عن القرار باعتباره موقفًا يتماشى مع رؤية النادي، على الجانب الآخر لم يلقَ هذا الموقف إجماعًا داخل المنظومة الإعلامية المرتبطة بالنادي. فقد وجه بعض النقاد والصحفيين والإعلاميين المنتمين للنادي الأهلي انتقادات لاذعة للقرار، معتبرين إياه مضر بمكانة الفريق ويؤثر على صورته التنافسية.

وفي هذا التقرير نستعرض آراء بعض الإعلاميين والنقاد الرياضيين ومسئولين سابقين بإدارة النادي الأهلي.

رأي أحمد يماني في قرار انسحاب الأهلي من لقاء القمة

كتب أحمد اليماني الصحفي المتخصص في الشأن الرياضي عبر صفحته الشخصية بموقع التواصل الإجتماعي فيسبوك: “ترردت قبل ما اكتب ال Post دا عشان موجعش دماغي بس قررت اني هكتب دا للتوثيق و إن الأمانة في الرأي تقتضي اني أقول رأيي في كل الظروف، الصورة دي انا خدتها من موبايلي النهاردة عشان أوثق أسوء يوم في تاريخ الاهلي من بداية تشجيعي.. طوال 34 سنة من أول م وعيت على الكورة وانا بتعلم من الرياضة ومن الأهلي قيم كتير..من ضمنها المواجهة وعدم الانسحاب..والاهلي بمن حضر..اني هلعب في كل الظروف وهعمل اللي عليا..اني عمري م ادي ضهري للملعب وأنسحب طالما ارتضيت ألعب..ان طالما في ماتش هيتلعب أبقي موجود ومينفعش اسيب المنافس ينزل وجمهوري في الملعب ومجيش !! أكتر من 30 الف مشجع للأهلي موجودين في الملعب مستنيين فريقهم”.

وتابع: “فريقهم اللي هيواجه الزمالك الأضعف في كل شئ..اللي فاقد المنافسة على البطولة..اللي عنده اصابات في قوامه الأساسي زي عبد الله السعيد اللي عنده مشكلة في ضهره ومش هيلعب..زي ناصر منسي زي مصطفي شلبي..زي محمود جهاد..زي الجفالي..الزمالك معندوش بدلاء..فأنا الطرف الأقوي ازاي ملعبش !! وعندي ماتش بعده بيراميدز اكسب الماتشين اخد الدوري”.

واختتم: "ايه الكارثة والمصيبة اللي حاصله اللي تخليني اخد أكثر قرار عشوائي شوفته في تاريخ تشجيعي للأهلي؟ عايز تنسحب من بطولة انسحب..عايز تمتنع عن المشاركة في بطولة امتنع..لكن مينفعش أسيب المنافس ينزل الملعب ومروحش وانا بقالي 5 أيام كان ممكن اعترض فيهم قبلها !! ودا مش أي منافس..دا نادي الزمالك اللي هو ماتش ديربي، الحقيقة انا مش قادر اخفي ضيقي وغضبي الشديد من اللي حصل..وأكتر لحظة غضبت فيها من قرار خدته إدارة الأهلي..وهيفضل القرار دا نقطة سوداء في تاريخ الادارة الحالية..ومش قادر أبدًا استوعب كمية التطبيل للقرار دا نهائيًا...اللي شوفته النهاردة منظر مخزي".

رأي الإعلامي عبد الرحمن مجدي في قرار انسحاب الأهلي من لقاء القمة

أبدى الإعلامي عبد الرحمن مجدي اعتراضه على قرار انسحاب الأهلي من مباراة القمة وكتب على صفحته الشخصية بموقع التواصل الإجتماعي فيسبوك: “المحصلة النهائية، هو أحد أسوأ القرارات في تاريخ الأهلي .. و لأول مرة أشوف عدد أهلاوية مش قليل غاضبين من القرار رغم ان المواقف اللي من النوع ده عادةً دايماً بتلقى مساندة جماهيرية لكن المرة دي الوضع مختلف”.

وتابع: "تصعيد مفاجئ و مش مفهوم و عند، و طبعا إدارة سيئة للملف بالكامل من الرابطة من أول قرعة الذكاء الصناعي المفاجئة بتاعت الفجر (اللي هي مش قرعة) و إعلان القمة قبلها ب٥ أيام فقط، قرار انسحاب الأهلي لا يختلف إطلاقاً عن قرارات الانسحاب بتاعت الزمالك اللي كان الكل بينتقدها و بيشوفها عشوائية".

رأي أشرف طه مدير ادارة الخدمات السابق بالنادي الأهلي في قرار انسحاب الأهلي من لقاء القمة

فيما علق أشرف طه مدير إدارة الخدمات السابق بالنادي الأهلي على قرار انسحاب الأهلي من مباراة القمة عبر صفحته الشخصية بموقع التواصل الإجتماعي فيسبوك وقال: “أسود يوم في تاريخ النادي الاهلي، كفاية عك وبهدلة في إسم النادي، ليه ماخدتش القرارات العنترية دي من ٣ أيام مع علمك بان الحكام مصريين، كان لازم نلعب حتي لو الحكم محمد لطيف، من امتي واحنا بننسحب بالشكل المهين ده” .

وتابع: “خسرنا ٣ نقط بدون لعب وأكيد خصم ٣ نقط كمان في نهاية الموسم، ضيعنا الدوري باايدينا ودخلنا الزمالك منافس معانا علي المركز التاني، ماصعبش عليك منظر الجمهور الغلبان اللي انكسر امام جمهور المنافس، الجمهور اللي راح فطر في الاستاد وفاءا للنادي العظيم، مش ده النادي الاهلي ابداا للاسف، المعرضين والمنتفعين والمطبلاتية يمتنعون” .

انسحاب الأهلي من لقاء القمة:

وفاز الزمالك اعتباريًا على  الأهلي بنتيجة 3-0 جراء انسحاب الأخير من القمة رقم 130، والتي كان من المقرر إقامتها في مساء أول أمس الثلاثاء على ستاد القاهرة الدولي.

على الجانب الآخر أعلن أحمد حسام ميدو، عضو لجنة التخطيط بنادي الزمالك، عبر حسابه الرسمي على "إكس"، التزام ناديه بمكان وموعد مباراة القمة على استاد القاهرة، وتواجد الفريق في الملعب بالموعد المحدد، مشددًا على أن فريقه ليس طرفًا في الأزمة.

وبالعودة لتاريخ مواجهات قمة الأهلي والزمالك بـ صافرة مصرية، التقى الغريمين في 9 مباريات سابقة، جاءت نتائجها في صالح المارد الأحمر بـ6 انتصارات مقابل انتصارين فقط للفارس الأبيض، ومباراة واحدة انتهت بالتعادل الإيجابي 1-1.

في نفس السياق، عقد الكولومي أوسكار رويز، رئيس لجنة الحكام باتحاد الكرة، اجتماعًا مع طاقم التحكيم المصري المكلف بإدارة مباراة القمة 130 بين الغريمين الأهلي والزمالك، والتى كان مقررا  إنطلاقها مساء أمس، ضمن الجولة الأولى من مجموعة حسم بطل الدوري الممتاز في الموسم الجاري 2024-2025.

ومن المقرر، أن يتوقف الدوري المصري الممتاز لمدة تصل إلى حوالي شهر، نظرًا لإرتباطات المنتخب الوطني في الجولتين الخامسة والسادسة من تصفيات كأس العالم حيث سيواجه الفراعنة خلال فترة التوقف الدولي كلًا من: أثيوبيا وسيراليون يومي 21 و25 مارس الجاري.

الزمالك يحرر محضر

حرر المستشار القانونى لنادي الزمالك، محضر إثبات حالة فى قسم شرطة مدينة نصر، ذكر فيه أن الفريق الأول توجه إلى استاد القاهرة  الدولى لخوض اللقاء الذي كان مقررا مساء الثلاثاء، أمام النادى الأهلى، وفقا للموعد المحدد من رابطة الأندية واتحاد الكرة.

وقال ممثل نادى الزمالك، فى المحضر الذى حمل رقم 997 لسنة 2025 إداري مدينة نصر، إن الفريق الأول حضر إلى ملعب المباراة باستاد القاهرة في الموعد المحدد، ونزل لأرض الملعب وكذلك طاقم التحكيم إلا أن الفريق  المنافس لم يحضر حتى مرور الوقت المحدد وفقا للمادة 17 من لائحة المسابقات، وبالتالي يعتبر  الزمالك فائزًا بالمباراة ويحصل على 3 نقاط تضاف إلى رصيده.