منى الشاذلي عن أزمة "اللوحات المزيفة": اخترنا نكون ناس مش قُضاة|فيديو

خصصت الإعلامية منى الشاذلي مقدمة حلقتها، للحديث عن الأزمة الأخيرة اللي حصلت بسبب عرض لوحات فنية في إحدى الحلقات السابقة، واللي ظهرت فيها الإعلامية مها الصغير وهي بتنسب لنفسها لوحات اتضح بعد كده إنها لفنانين أجانب.

منى بدأت كلامها خلال  برنامجها" معكم مني الشاذلي " المذاع عبر قناة ON، وقالت إن الحلقة كانت معمولة بشكل طبيعي جدًا، واستضافوا فيها عدد من الضيوف اللي حكوا عن اهتماماتهم، ومنهم ضيفة قالت إن الرسم هواية عندها، وقدّمت شوية لوحات على إنها من شغلها.

"الإجراء المهني اتعمل فورًا"

أول ما البرنامج اتأكد إن في لوحة منسوبة لفنانة دنماركية اسمها "ليزا لاك نيلسين"، فريق العمل نشر بيان رسمي يوضّح ملكية العمل لصاحبته الأصلية، ونفس الشيء اتعمل مع باقي اللوحات اللي اتبيّن إنها لفنانين من ألمانيا وفرنسا، وأكدت منى إن ده مش بس احترامًا للمهنة، لكن كمان عشان البرنامج دايمًا بيشتغل بمبدأ "ردّ الحقوق لأصحابها".

"مش كل ضيف بنشكك في كلامه"

منى وضّحت نقطة مهمة جدًا، وقالت: "الإعلام بيتعامل مع شخصيات كتير، مش كل مرة بنسمع ضيف بيقول حاجة عن نفسه لازم نحقق فيها، خصوصًا لو ما فيش مؤشر واضح إنها غلط أو فيها تجاوز قانوني". وأضافت إنهم مش بيتعاملوا مع الضيوف وكأنهم متهمين.

"ما حبّيناش نشارك في حفلة جلد إنسانة"

وكان أكتر جزء مؤثر في كلام منى، لما قالت:"كان سهل علينا جدًا نركب الموجة ونهاجم ونزايد، بس وقفنا وسألنا نفسنا: هنستفيد إيه؟! الست خلاص اتهاجمت كفاية، واللي عملته كان غلط فعلاً، بس هل مطلوب مننا نزوّد عليها كمان؟".

وأضافت: "إحنا غضبنا من اللي حصل، لكن اخترنا نلتزم بالأخلاق المهنية، لأن دي مبادئنا من أول يوم.. مش هنبقى طرف في قسوة العالم، حتى لو أغضبنا ده ناس كتير".

"الموقف خلص، لكن القيم بتفضل"

منى الشاذلي ختمت كلامها برسالة واضحة، إنهم في البرنامج اختاروا "الموقف الإنساني"، مش لأنهم بيدافعوا عن الخطأ، لكن لأنهم بيؤمنوا إن الشخص اللي غلط بيدفع تمن غلطته، ومش لازم نظل نجلده.
واختتمت:"هنفضل نختار المهنية والرحمة، حتى لو كل الدنيا ماشية في اتجاه تاني، لأن ده اللي إحنا عليه.. وده اللي هنفضل عليه".