"عمري ما شربت دخان".. أمينة توجه رسالة لمنتقدي المطربين بسبب أحمد عامر

أعربت المطربة أمينة  عن غضبها من تعليقات مسيئة ظهرت على فيديوهات عزاء الفنان الراحل أحمد عامر، مؤكدة أنها شاركت في العزاء داخل نقابة المهن الموسيقية، وأن ما كتب على بعض الفيديوهات لا يمت للواقع بصلة.

أمينة تخرج عن صمتها 

وقالت أمينة عبر حسابها على موقع تبادل الصور والفيديوهات الشهير"إنستجرام": “استفزني كومنتات لاقيتها على فيديوهات عزاء أحمد عامر، الله يرحمه ويحسن إليه، والناس معذورة برضه، العناوين المكتوبة على الفيديوهات لا تمت للواقع بصلة، روحت عزيت نقابة المهن الموسيقية، كل ده تمام، يطلع واحد وغيره كتير مش فاهمين أي حاجة، بيهبدوا وخلاص”.

وتابعت أمينة: خلاص مش لاقيين حاجة تتهمونا بيها، تتهمونا إن إحنا بنشرب وبندخل المكيفات مصر، أنا هتكلم عن نفسي، أنا واحدة من الناس اللي مقدرش أشرب ميه ساقعة ولا دخان من أي نوع، وحسبي الله ونعم الوكيل في اللي يقول ما ليس فينا.

وأضافت أمينة: "اللي يشرب يشرب، هو حر طالما مش بيأذيني، أنت كده اتهمت واحد متوفي وغيره فنانين كتير مالهمش في أي حاجة، اتقِ الله، واللي كاتب إني موقفتش في عزاء أخويا، منك لله يا أخي، الحمد لله، صلتي بكل قرايبي زي الفل، ما بالك أخويا.. الحمد لله، لا عمري طلعت من توبى، ولا عشت الدور، ولا ليا مع حد خصومة، وغصب عني كتبت كده، لأول مرة، الناس بقت مستفزة جدًا وقليلة أدب، إلا من رحم ربي، إنتم لا تعرفونا ولا تعرفوا إحنا فينا إيه وبنعاني من إيه، حسدتونا وعينيكم جابتنا الأرض، قاعدين تحسبوها لنا، وأراهن أي حد فيكو عنده موهبة كصوت أو كممثل وما يستغلهاش، مش ذنبنا إن إحنا فنانين بالفطرة والموهبة، وإنت قاعد تحسبها لنا".

واختتمت أمينة حديثها قائلة: أنت ما تعرفش بندفع إيه قدام ده، منكم لله بجد، معظم الناس حاطة الفنانين دول في فريم إن إحنا تماثيل شمع، مش بنحس ولا عندنا دم، اتقوا الله فينا، كفاية، إنتم ما تعرفوش إحنا فينا إيه، اتقوا الله.

النجوم في عزاء أحمد عامر

ويحرص على حضور عزاء أحمد عامر، عدد من نجوم الغناء، أبرزهم نقيب المهن الموسيقية مصطفى كامل ومحمود الليثي وحمو بيكا وحمادة الليثي وغيرهم، بالإضافة إلى أصدقاء وأقارب الراحل.